Menaxhimi i burimeve ujore – Qeveria harton ligj të ri. Detyrim për plotësimin e kushteve të integrimit në BE

Menaxhimi i burimeve ujore do të kryhet përmes një ligji tërësisht të ri, teksa në Kuvend ka mbërritur drafti i propozuar nga qeveria. Sipas relacionit shoqërues, projektligji ka si qëllim mbrojtjen e burimeve ujore nëpërmjet ruajtjes, zhvillimit dhe përdorimit racional të tyre, si një gjë e nevojshme për jetën dhe zhvillimin social-ekonomik të vendit.

Në rast të arritjes së dakordësisë, dokumenti i propozuar do të realizojë objektivat e qeverisë në përgjigje të procesit të integrimit në BE, në kuadër të hapjes së negociatave dhe marrjen në konsideratë të rekomandimeve për kapitullin 27 të progres raporteve.

Po ashtu, synohet të realizohet adresimi i plotë të problematikave të identifikuara; reduktimi i fragmentimit institucional në sektorin e burimeve ujore, përcaktimi i standardeve mjedisore, kontrolli i shkarkimeve, etj.

Ndërkaq, zbatimi i projektligjit të propozuar do të shoqërohet me kosto shtesë për qeverinë, e lidhur kryesisht me shtimin e stafit të nevojshëm për disa nga institucionet që do të ngarkohen me zbatimin e tij, sikurse është Agjencia e Menaxhimit të Burimeve Ujore, Agjencia Kombëtare e Mjedisit, Instituti i Gjeoshkencave, Instituti i Shëndetit Publik, etj. Për vitin 2024 kostot përllogariten në rreth 5.7 mld lekë ndërkohë që për vitin 2025, 5.6 mld lekë.

Sipas qeverisë, financimi për zbatimin e ligjit do të ndahet edhe me fondet e huaja, të parashikuara në kuadër të financimit në formë granti nga IPA III sikurse specifikohet në dokumentacionin e dakordësuar midis qeverisë shqiptare dhe BE-së. Ndërkohë që, edhe performanca e mbledhjes së të ardhurave nga tarifat e përdorimit të ujit në vitet e fundit ka pasur një trend të theksuar rritës krahasuar me vitet paraardhëse.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.