Nafta, në nivelin më të ulët në 5 muaj – Ndikon frika për ngadalësimin e kërkesës në Kinë

Nafta po qëndron në rënie në sesionin e sotëm, pasi tregjet vijojnë të dyshojnë në lidhje me ndikimin e vendimit të OPEC+ për të ulur prodhimin. Edhe të dhënat e publikuara në Kinë kanë ushtruar presion mbi çmimet.

Nafta Brent e Londrës ka zbritur poshtë 77 dollarëve për fuçi, ndërsa nafta Bruto amerikane po tregtohet poshtë 72 dollarëve për fuçi. të dyja kontratat kanë prekur nivelin më të ulët që nga 6 korriku.

Shkurtimet vullnetare të prodhimit prej rreth 2.2 milionë fuçi në ditë, për tremujorin e parë të vitit 2024 nga OPEC+ nuk kanë arritur të mbështesin ndjenjën e tregut, mes skepticizmit nëse shkurtimet do të zbatohen plotësisht.

Kjo ulje përfshin edhe uljet aktuale vullnetare të Arabisë Saudite dhe Rusisë, prej 1.3 milionë fuçi naftë në ditë. Edhe komentet e zëvendëskryeministrit rus, Alexander Novak se OPEC+ ishte “gati për të ndërmarrë veprime shtesë nëse do të jetë e nevojshme” nuk ndikuan në ndjenjën e tregut.

Ndërkohë, presidenti rus, Vladimir Putin do të vizitojë vendet kryesore të OPEC, Arabinë Saudite dhe Emiratet e Bashkuara Arabe, për të zhvilluar bisedime që përfshijnë edhe bashkëpunimin në tregun e naftës. Gjatë ditës së sotme, humori i investitorëve është goditur edhe nga shqetësimet për shëndetin ekonomik të Kinës.

Të martën, agjencia e vlerësimit të kreditit, Moody’s uli vlerësimin A1 të Kinës në negative nga e qëndrueshme që ishte më parë, duke përmendur si arsye kryesore “rritjen e rreziqeve që lidhen me ngadalësimin strukturor dhe të vazhdueshëm të ekonomisë në terma afatmesëm dhe rënien e vazhdueshme të sektorit të pronave”. Ndërkohë, referuar të dhënave në SHBA nga Instituti Amerikan i Naftës, rezervat e naftës bruto u rritën me 594,000 fuçi, gjatë javës që u mbyll më 1 dhjetor.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.