Projektligj i posaçëm për gjyqtarët e prokurorët KÇK – Drafti, të shkurtohen procedurat, pezullim i menjëhershëm magjistratëve me shkelje

Procedurat ndëshkuese ndaj gjyqtarëve e prokurorëve të kapur me shkelje do të nisin menjeherë pas konstatimit të tyre, ndërkohë që aktualisht ato zvarriten për shkak të hapësiravë që lejon ligji. Këshilli i Ministrave ka nxjerrë për konsultim public një projektligj i cili ka për qëllim ndryshimin e afatit të shqyrtimit të kërkesës të pezullimit të magjistratëve nga detyra (gjyqtarëve dhe prokurorëve) nga Këshillat përkatës (Këshilli i Lartë Gjyqësor/Këshilli i Lartë i Prokurorisë), me qëllim ndalimin e abuzimit të magjistratit me sistemin e drejtësisë, kur vendimmarrjet e tyre kanë rezultuar haptazi në kundështim me ligjin apo kryejnë veprime që diskreditojnë rëndë figurën dhe pozitën e magjistratit.

Në këtë kuadër, është ndërmarrë nisma për ndryshimin e afatit për shqyrtimin e kërkesës së pezullimit nga Këshillat respektivë, i cili aktualisht parashikohet afat tre ditor nga momenti i marrjes së kërkesës për pezullim nga Inspektori i Lartë i Drejtësisë apo informacionit përkatës, referuar nenit 152 dhe nenit 155 të ligjit nr. 96/2016, ‘Për statusin e gjyqtarëve dhe prokurorëve në Republikën e Shqipërisë’.

Sipas neneve 1 dhe 2 të projektligjit, Këshillat përkatës do të duhet të organizohen dhe mblidhen menjëherë për shqyrtimin e kërkesës për pezullimin e magjistratit, duke konkluduar me vendimmarrje konkrete për pranimin ose jo të kërkesës së pezullimit

Kjo iniciativë ligjore vjen në kuadër të Këshillimit Kombëtar për Shqipërinë, ku me një pyetësor drejtuar çdo shqiptari, në Shqipëri apo në botë, u zhvillua një kuvendim popullor, në të cilin u mor mendimi i qytetarëve mbi çështje me rëndësi strategjike për vendin, ekonominë, shoqërinë.

Një ndër pyetjet drejtuar qytetarëve konsistonte në çështjen nëse duhen pezulluar nga detyra gjyqtarët dhe prokurorët që nuk kanë kaluar ende procesin e vettingut, nëse vendimmarrjet e tyre rezultojnë haptazi në kundërshtim me ligjin (pyetja nr. 10). Si bazë arsyetuese për përcaktimin e kësaj pyetjeje, është parashikuar se pavarësisht se vitet e fundit janë ndryshime legjislative për të luftuar fenomenin e njohur si KÇK, një pjesë e gjyqtarëve dhe prokurorëve në pritje të vettingut vazhdojnë të abuzojnë me pushtetin e drejtësisë.

Lorenc Rabeta / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.