Shqiptarët nuk dinë çfarë taksash paguajnë! – Anketa: 83% shprehen se janë të larta, afro gjysma e tyre duan ti shmangen

Pavarësisht se qytetarët kanë detyrim të paguajnë një sërë taksash dhe tarifash vendore çdo muaj, 23 për qind e tyre nuk kanë asnjë informacion se çfarë taksash paguajnë. Sipas një ankete të realizuar nga CoPlan, 72 për qind janë relativisht të njohur, me detyrimet që kanë kundrejt bashkive.

Por ajo që del në pah është mungesa e transparencës së bashkive dhe organizimi i dëgjesave publike, pasi 92 për qind e qytetarëve të anketuar deklarojnë se nuk kanë marrë pjesë asnjëherë në një dëgjesë publike.

Pjesëmarrja e ulët në dëgjesa publike dhe mosnjohja me paketën fiskale pasqyrohet në paqartësi mbi çfarë taksash paguhen, mënyrën e pagesës së tyre dhe mungesë të njohurive në lidhje me mënyrën e llogaritjes së detyrimeve vendore, ku 49%  nuk e kanë idenë se si bëhet llogaritja dhe për pasojë një pjesë e madhe e tyre nuk ka bërë ndonjëherë kërkesë për korrigjim të dhënash apo ankesë për detyrimet vendore.

Referuar raportit, një nivel i lartë i njohurive mbi detyrimet vendore vlerësohet se do të kontribuonte pozitivisht në qasjen e taksapaguesve ndaj detyrimeve vendore, do të përmirësonte mbledhjen e të ardhurave nga taksat dhe tarifat vendore, faktor ky thelbësor për financa të shëndetshme në nivel vendor dhe shërbime publike cilësore për qytetarët.

Por niveli i taksave dhe tarifa vendore është element me rëndësi dhe përcaktues në pagesën e tyre. Në vlerësimin e rreth 83% të të intervistuarve, niveli i detyrimeve vendore perceptohet të jetë i lartë çka kufizon aftësinë e tyre paguese.  Si e tillë rezulton shqetësues fakti se afro gjysma e qytetarëve shprehen se nesë do të kishin mundësi dhe hapsirë, do ti shmangeshin pagesës së detyrimeve, edhe pse aktualisht rezulton se 13 për qind nuk paguajnë.

Elisabeta Dosku/ SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.