“Tkurren” rezervat globale të hekurit – Goldman Sachs parashikon rritje të çmimit me mbi 20%

Tregu i mineralit të hekurit po regjistron një mungesë për pjesën tjetër të vitit për shkak të nivelit të ulët të rezervave dhe rënies së prodhimit, sipas Goldman Sachs. Në raportin më të fundit të publikuar theksohet se në vend që të përballet me një suficit për këtë vit, tregu i mineralit të hekurit është drejtuar tashmë në rrugën e një deficiti të qartë.

Analistët vunë në dukje se sasia e shpenzimeve të fundit të Pekinit mund të jetë një shenjë pozitive e rritjes së brendshme, e cila shpesh shoqërohet me një industri ndërtimi më të shëndetshme dhe nga ana tjetër, një kërkesë më të lartë për mineral hekuri. Metali përdoret kryesisht për prodhimin e çelikut, një material i rëndësishëm në projektet e ndërtimit dhe inxhinierisë.

Në fund të tetorit, qeveria qendrore e Kinës tha se do të emetojë 139 miliardë dollarë obligacione qeveritare shtesë për të mbështetur përpjekjet për rindërtimin e zonave të goditura nga katastrofa dhe për të rritur aftësitë e vendit për t’u rimëkëmbur nga fatkeqësitë.

Duke thënë kështu, Goldman mbetet i kujdesshëm në atribuimin e optimizmit në rritjen e kërkesës për çeliku që vjen nga sektori i dëmtuar i pronave në Kinë. Kriza e pronave në Kinë ka qenë një nga çështjet kryesore për arritjen e një rimëkëmbjeje të qëndrueshme ekonomike.

Furnizimet globale të mineralit të hekurit në vitin 2023 janë reduktuar nga 1.557 miliardë ton në 1.536 miliardë ton, sipas vlerësimeve të Goldman. Ky rishikim në rënie pasqyron performancën e dobët në furnizimin australian dhe brazilian gjatë tremujorit të tretë. Për më tepër, Goldman vërejti se rezervat e pakta të mineralit të hekurit në Kinë, prodhuesi i tretë më i madh në botë, gjithashtu do të kontribuojë në mungesë.

Mungesa e pritshme është një ndryshim nga parashikimi i mëparshëm i Goldman për një suficit, me analistët e bankës së investimeve që e rrisin parashikimin e çmimit të mineralit të hekurit me mbi 20%.

Goldman pret që mesatarja e plotë e vitit për mineralin e hekurit 62% të rritet nga 101 dollarë për ton në 117 dollarë në 2023. Për vitin 2024, analistët presin një rritje të çmimit në 110 dollarë për ton, kundrejt parashikimit të mëparshëm prej 90 dollarë për ton.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.