Tregjet europiane, në kujdes – Aksionet e Metro Bank bien me 29% dhe të Alstom me 35%

Bursat europiane po shfaqen të qëndrueshme edhe në sesionin e sotëm, ndërsa në fokus të tregjeve janë lëvizjet e yield-it të obligacioneve në Shtetet e Bashkuara të Amerikës. Indeksi pan-Europian Stoxx 600 po qëndron në rritje të lehtë me 0.2%, ndërsa ka publikuar humbje në tre sesionet e kaluara.

Interesi i obligacioneve 10-vjeçare amerikane ra lehtë në sesionin e kaluar, duke ju larguar nivelit më të lartë që nga viti 2007, pasi të dhënat mbi punësimin në SHBA  treguan se ekonomia më e madhe në botë krijoi vetëm 89 mijë vende të reja pune, gjatë shtatorit, ndërsa analistët parashikonin 160 mijë vende të reja pune.

Për sa i përket korporatave, tregtimi i aksioneve të bankës britanike, Metro, u pezulluan dy herë gjatë ditës së sotme pasi aksionet e saj ranë me më shumë se 29%. Sipas Reuters, rënia pasoi lajmet se banka po përpiqej të mblidhte rreth 600 milionë paund në borxhe dhe kapitale. Metro Bank që ka filluar nga puna në vitin 2010 ka një kapital prej vetëm 100 milionë paund.

Edhe aksionet e kompanisë franceze, Alstom kanë rënë me më shumë se 35% në sesionin e sotëm, për shkak të një vonese me tregtimin e aksioneve. Kjo ishte performanca më e keqe në 20 vitet e fundit.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.