Zbehet euforia në tregun e kriptomonedhave – Bitcoin zbret drejt 42,000 USD, ndikojnë politikat monetare

Tregu i kriptomonedhave i është rikthyer humbjeve në sesionin e sotëm, me bitcoin që ka zbritur drejt 42,000 dollarëve. Divergjencat mes sinjaleve të Rezervës Federale, në njërën anë, dhe Bankës Qendrore Europiane dhe Bankës së Anglisë, në anën tjetër, kanë bërë që investitorët të ripozicionohen në tregje.

Të mërkurën, shefi i FED, Jerome Powell, deklaroi se cikli i rritjes së interesave ka arritur kulmin, ndërsa sinjalizoi të paktën 3 ulje gjatë vitit 2024. Ulja e interesave nga bankat qëndrore rrit oreksin e investitorëve për asete me risk, ku bën pjesë edhe tregu i kriptomonedhave.

Por, bankat qëndrore në Europë bënë thirrje se normat e interesit do të qëndrojnë të larta për një kohë të gjatë, duke hedhur poshtë spekulimet se ulja e interesave do të vijë në gjysmën e parë të vitit 2024. Megjithatë, treguesit kryesorë që ndjekin aktivitetin e “blockchain” të bitcoin, flukset e “minatorëve” dhe mesatarja lëvizëse 200-ditore sugjerojnë se bitcoin është larg të qënit i mbivlerësuar dhe mund të vazhdojë të rritet në vitin 2024.

Bitcoin (BTC) është rritur mbi 160% këtë vit, duke performuar më mirë se asetet tradicionale si S&P 500, ari dhe dollari amerikan, me një diferencë të madhe. Ndër zhvillimet e tjera, gjigandi i Wall Street, JPMorgan ka ofruar një panoramë të kujdesshme në lidhje me tregjet e kriptomonedhave në vitin 2024, por pret që ethereum të tejkalojë bitcoin dhe kriptovalutat e tjera për shkak të një përmirësimi që do ta bëjë “blockchain” e Ethereum më të shkallëzuar.

Ndërsa në lidhje me vendimin e pritshëm të Komisionit të Letrave me Vlerë dhe Shkëmbimeve në SHBA për të miratuar fondet e tregtuara në shkëmbim (ETF), JPMorgan thonë se nuk ka gjasa të nxisë fitime të mëdha.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.