A ofrohet falas Programi i Kodimit? – Vëzhgimi: Kurset variojnë nga 50 mijë lekë deri në 4500 euro!

SCAN ndërmori procedurën e aplikimit për këtë program. Ajo që rezulton është se për një kurs hyrje në programim, të rinjtë duhet të paguajnë një vlerë prej 50 mijë lekësh. Ky kurs do të zhvillohet në një nga qendrat private në Tiranë të përcaktuara në e-Albania nga qeveria dhe do të jetë për një afat kohor prej 4 muajsh.

Të rinjtë të cilët do aplikojnë mund të subvencionohen nga qeveria por sesa, do të përcaktohet nga ajo. Deri më tani, programi parashikon rimbursimin 100 % për punëkërkuesit e papunë të regjistruar të cilët do të ndjekin një program profesional dhe deri në 50 % për punëkërkuesit e tjerë.

Parashikimet për subvencionin e qeverisë janë për një shumë nga 15 deri në 30 mijë lekë. Pjesa tjetër, do të duhet të paguhet nga vetë familja që regjistron fëmijën në këtë program. Pra, Programi i Kodimit i ofruar nga qeveria do të kërkojë një angazhim të konsiderueshëm financiar nga ana e atyre që përfshihen.

Të tjera kurse që do të ofrohen janë shkencë të dhënash, siguri kibernetike, elektronikë, robotikë, dizajn software, realitet virtual, inteligjencë artificiale. Për këto kurse periudha fillon nga 3 muaj deri në 9 muaj të cilat mund të ndiqen disa herë në javë ose çdo ditë.

Çmimet e qendrave të kurseve që publikohen në e-Albania janë nga më të ndryshmet nga 50 mijë lekë e deri në 4500 euro. Kjo nismë e qeverisë synon aftësimin dhe përfshirjen e sa më shumë të rinjve drejt teknologjisë inovacionit dhe dixhitalizimit.

Marinela Lina/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.