FMN i jep “notë kaluese” Maqedonisë së Veriut – “Vendi vazhdon rimëkëmbjen drej rritjes ekonomike”

Në raportin e publikuar nga Fondi Monetar Ndërkombëtar për situatën ekonomike të Maqedonisë së Veriut, thuhet se vendi vazhdon të rimëkëmbet nga kriza energjetike europiane e vitit të kaluar. Pas rritjes së fortë ekonomike në gjysmën e parë të 2023, stafi i FMN-së parashikon që ekonomia të zgjerohet me 2.3 % këtë vit dhe me 3 % vitin e ardhshëm. Në veçanti, kërkesa e brendshme parashikohet të përshpejtohet deri në vitin 2024, e mbështetur nga rritja e investimeve.

Për të mbështetur konsolidimin fiskal, FMN bëri apel që Maqedonia e Veriut të ruajë në nivele të përmbajtura shpenzimet aktuale. Në veçanti, qeveria dhe sindikatat kanë një rol kyç për të luajtur në avancimin e politikave të kujdesshme dhe mbajtjen e shpenzimeve në nivele të qëndrueshme përpara zgjedhjeve.

Gjithashtu, këshillohet reduktimi i mëtejshëm i subvencioneve të energjisë. Përderisa rritja e tarifave të energjisë elektrike ka ndikuar në buxhetet e familjeve, tarifat e energjisë elektrike mbeten shumë të subvencionuara në Maqedoninë e Veriut, ato nuk janë të shënjestruara sa duhet dhe heqin burimet nga shpenzimet e tjera prioritare, si infrastruktura, shëndetësia dhe arsimi.

Ndërsa për të rritur mobilizimin e të ardhurave tatimore, qeveria ka miratuar reforma të politikës tatimore që synojnë zgjerimin e bazës tatimore për tatimin mbi të ardhurat personale dhe të korporatave, uljen e përjashtimit nga TVSH-ja dhe rritjen e akcizave. Përtej reduktimit të deficitit, nevojiten disa reforma strukturore fiskale.

Në raportin e FMN – së thuhet se inflacioni është në rënie falë shtrëngimit të politikës monetare dhe normalizimit të çmimeve globale të energjisë dhe ushqimeve. Megjithatë, rreziqet rritëse ndaj inflacionit mbeten dhe banka qendrore duhet të jetë e gatshme të shtrëngojë më tej politikën monetare nëse këto rreziqe materializohen. Megjithatë, rritja e lartë e pagave nominale prej rreth 15 %, nëse ruhet si e tillë, krijon rreziqe që inflacioni të ripërshpejtohet.

Maqedonia e Veriut ka arritur stabilitet makroekonomik, por tani duhet të zynojë një rritje më të lartë. Të ardhurat për frymë të Maqedonisë së Veriut ishin 27% ndaj nivelit të BE-së në vitin 2000, 38% në vitin 2010 dhe pak më poshtë se 40% aktualisht.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.