Kina i tregon forcën perëndimit – Pekini po godet “aty ku dhemb”, ose të paktën po tregon se mundet

Kina po godet Perëndimin “aty ku i dhemb”, ose të paktën po tregon se mundet. Pekini konfirmoi se po vendos kufizime të veçanta për eksportin e produkteve të caktuara të grafitit që përdoren në prodhimin e baterive për automjetet elektrike. Ky vendim shihet qartazi si hakmarrje për kufizimet e reja të Uashingtonit mbi eksportet e mikroprocesorëve. Prodhuesit e automjeteve në mbarë botën do të luftojnë për të gjetur furnizues alternativë pasi Kina kontrollon pothuajse të gjithë përpunimin.

Grafiti, si natyral ashtu edhe artificial, është i nevojshëm për të bërë anodin, i vetmi material sintetik që lejon elektricitetin të kalojë përmes baterisë. Kërkesa globale për grafit, e cila arriti në 770 mijë tonë këtë vit, pritet të trefishohet deri në vitin 2033, sipas vlerësimeve të Fastmarkets.

Kina përbën 64% të prodhimit natyror të grafitit në botë dhe mbi 50% të grafitit artificial. Gjëja kryesore, megjithatë, është se mbi 90% e përpunimit dhe shndërrimit të grafitit në formën e pastër të përdorur në bateritë e automjeteve elektrike ndodh në Kinë.

Me kufizimet e reja të vendosura nga Pekini, të cilat do të hyjnë në fuqi nga 1 dhjetori, tashmë kompanitë eksportuese duhet të aplikojnë për një leje. Kjo është e njëjta taktikë që përdori një vit më parë kur vendosi kufizime në eksportet e galiumit dhe germaniumit, dy metale të përdorura për prodhimin e mikroprocesorëve dhe rrjeteve të fibrave optike. Kjo shkaktoi një rënie të eksporteve të mikroprocesorëve në nivel ndërkombëtar.

Kufizimet e reja nuk nënkuptojnë domosdoshmërisht se Kina do të ndalojë së dërguari në pjesën tjetër të botës. Një veprim i tillë do të dëmtonte prodhuesit kinezë të anodës si ata që kanë investuar miliarda për të ndërtuar objekte prodhimi në Finlandë dhe Suedi. Por Pekini mund të përdorë në mënyrë selektive kërkesën e licencimit për të ngadalësuar përpjekjet e kompanive perëndimore për të përsëritur zinxhirin e furnizimit të automjeteve elektrike të Kinës diku tjetër.

Do të duhen të paktën pesë vjet për të zhvilluar miniera të reja në Europë me potencial prodhimi tregtar. Dhe ndërtimi i objekteve të reja për përpunimin e metalit do të jetë jashtëzakonisht energjik dhe intensiv. Prodhuesit e automjeteve të angazhuar në tranzicionin e gjelbër, si Volkswagen, Tesla dhe të tjerë, nuk duan të presin derisa Europa dhe SHBA të përshpejtojnë. Dhe kjo është pikërisht ajo që Kina i kujtoi botës.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.