Të rinjtë preferojnë telefonat e vjetër celularë – Rriten me 30% shitjet për teknologjinë e së kaluarës

Brezi i ri po bën revolucionin e tij kundër efekteve të teknologjisë, pasi të shumtë janë ata që i kthejnë shpinën telefonave inteligjentë dhe zgjedhin celularët “memecë”. Rritja e problemeve të shëndetit mendor që rrjedhin nga përdorimi i tepruar i rrjeteve sociale dhe varësia ndaj celularëve në përgjithësi, për shkak të shumë funksioneve të tyre, po i bën të rinjtë t’i shohin celularët “memecë” si një alternativë joshëse që do t’u sigurojë atyre vetëm më të nevojshmen: komunikimin.

Madje disa prej tyre e cilësojnë përdorimin e tepruar të celularëve njësoj të dëmshëm si abuzimin me alkolin. Ndërsa për sa i përket ekspertëve të marketingut ata shprehen se fenomeni po ndodh si pasojë e një ‘ mbingopjeje’ dixhitale tek të rinjtë.

Prodhuesit rrallë zbulojnë shifra të sakta të shitjeve, por kompania zvicerane Punkt tha se ka pasur një shtytje, veçanërisht tek brezi i ri, siç raportohet nga El Pais. Shitjet janë rritur më shumë se 30% në 2022 krahasuar me vitin e kaluar.

Sipas përfaqësuesve të prodhuesit të Nokia-s, shitjet e telefonave “memecë” u dyfishuan në vitin 2022 dhe kompania pret rritje të qëndrueshme të këtyre modeleve në vitin 2023. Hulumtimi i Counterpoint konfirmon se ky lloj telefoni po bëhet gjithnjë e më i popullarizuar. Vetëm në Shtetet e Bashkuara të Amerikës, afërsisht 2.8 milionë nga këto pajisje pritet të shiten deri në vitin 2023.

Megjithatë, nuk është vetëm detoksikimi dixhital që i bën ato të njohura. Fakti që nuk prishen, bateria zgjat shumë ditë dhe sigurisht fakti që janë jashtëzakonisht të lirë në krahasim me smartfonët, përforcojnë arsyet pse të rinjtë i zgjedhin.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.