Perspektiva dhe rreziqet për ekonominë e Kosovës – Sipas Bankës Botërore, shpenzimet kapitale publike pritet të nxisin investimet

Në raportin e rregullt ekonomik për Ballkanin Perëndimor, Banka Botërore nënvizon perspektivat dhe rreziqet më të cilat pritet të përballet ekonomia e Kosovës. Rritja e parashikuar e Prodhimit të Brendshëm Bruto me 3,2% për vitin 2023 mbështetet në performancën pozitive të eksportit dhe konsumit më të lartë privat.

Eksportet më të larta të shërbimeve pritet të kompensojnë uljen e eksporteve të mallrave dhe rritjen e importeve, duke çuar në kontribut pozitiv nga ngushtimi i bilancit tregtar në rritjen e PBB. Në të njëjtën kohë, rritja e fortë e kredisë dhe remitancave neto, mbështetur edhe nga nivele më të larta të transfertave publike, pritet ta mbështesin konsumin privat. Shpenzimet më të larta të pagave publike, të shoqëruara me rritjen e shpenzimeve publike për mirëmbajtje dhe shërbime, pritet të mbështesin rritjen e konsumit publik.

Nga ana e prodhimit, shërbimet pritet të japin një kontribut më të lartë sesa prodhimi dhe bujqësia së bashku. Perspektiva afatmesme mbetet pozitive, brenda një konteksti të pasigurisë së lartë.

Kontributi i investimeve pritet të rritet në vitet 2024–2025, i mbështetur nga rritja e investimeve në infrastrukturën publike, duke përfshirë me mbështetjen e financimit të jashtëm dhe investimeve më të larta publike dhe private në furnizim dhe efiçiencë të energjisë.

Sipas Bankës Botërore, riaktivizimi i kapaciteteve prodhuese të ferronikelit nga Kosova pritet të rrisë eksportet e mallrave. Ritja ekonomike pritet të përshpejtohet drejt 4% vitin e ardhshëm, ndërsa inflacioni do të ngadalësohet, por presionet e çmimeve mbeten të larta..

Megjithatë, Banka Botërore nënvizon se pasiguritë e vazhdueshme lidhur me luftën në Ukrainë dhe ndikimi i mundshëm i tyre në sektorin e energjisë në Kosovë, ngadalësimi i mëtejshëm i aktivitetit ekonomik në Evropë dhe përkeqësimi i kontekstit politik vendas përbëjnë rreziqe të rëndësishme.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.