Energji më të lirë për kompani të caktuara – Bizneset në Maqedoninë e Veriut: që prodhojnë vaj, qumësht e bukë do paguajnë dy herë më pak

Qeveria në Maqedoninë e Veriut deklaroi se do të mbështesë prodhuesit e vajit, prodhimeve të furrës, drithërave, si dhe përpunuesit e qumështit, por pritet që lista të zgjerohet edhe me kompanitë nga industria e mishit. Ata do të paguajnë energji nën 100 euro për megavat orë, që është dy herë më pak se çmimi në tregun e rregullt. Për këtë arsye pritet fillimisht të stabilizohet tregu, e më pas çmimi i bukës të ulet me 10%.

Ministri i Ekonomisë, Kreshnik Bekteshi, u shpreh se odat ekonomike duhet të parashtrojnë propozime shtesë me të cilat do të zgjerohet lista e kompanive për mbështetje. Bekteshi pret që për shkak të uljes së çmimit të energjisë elektrike, kompanitë nga industria ushqimore të ulin cmimet e produkteve të tyre. Nëse, dikush përfiton nga situata dhe prodhimet vendore i shet më shtrenjtë nga ato të importuarat, qeveria do të bllokojë këto produkte.

Sipas kompanive, energjia më e lirë për një muaj do të mundësojë stabilizim të tregut, dhe si rrjedhim do të ketë dhe ulje të cmimeve të produkteve.

Nënkryetari i Lidhjes së odave ekonomike, Goran Gjorgjievski sqaroi se pas energjisë më të lirë, fillimisht do të ketë stabilizim të tregut e më pas do të mund të përcaktohet se sa do të ulet cmimi i produkteve.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.