Gjermania pezullon bashkëpunimin në projektet energjetike me Kosovën

Gjermania ka vendosur të pezullojë përkohësisht bashkëpunimin me Kosovën në sektorë të ndryshëm për shkak të mungesës së veprimit të Prishtinës për qetësimin e situatës në veri. Pezullimi i bashkëpunimit prek edhe dy projekte të sektorit të energjisë.

Ambasada gjermane në Prishtinë ka konfirmuar për Radio Slobodna Evropa se vendimi për ndërprerjen e bashkëpunimit në sektorë të ndryshëm është marrë në përputhje me politikën e Bashkimit Evropian (BE), i cili më parë kishte vendosur masa kundër Kosovës.

Ambasada theksoi se masat gjermane nuk do të prekin projektet me sektorin e shoqërisë civile dhe as projektet që janë në vazhdim. Masat përfshijnë gjithashtu shtyrjen e partneritetit dypalësh të klimës, sipas ambasadës gjermane, njofton Balkan Green Energy.

Dy projekte të mëdha energjetike janë pezulluar

Sipas Balkan Green Energy, dy projekte të mëdha në sektorin e energjisë janë pezulluar.

Është anuluar projekti me vlerë 87 milionë euro për termocentralin diellor-termik 70 MW që do të siguronte ngrohje për 38 mijë banorë të Prishtinës.

Gjithashtu, një tjetër projekt afatgjatë që pret zhvillime të mëtejshme është një investim me vlerë 110 milionë euro. Projekti përfshin ndërtimin e kapaciteteve të energjisë diellore në deponinë e KEK-ut, i cili gjithashtu është pezulluar.

Projektet do të rifillojnë sapo situata të qetësohet

BE-ja ka marrë masa ndaj Kosovës pasi qeveria në Prishtinë ka injoruar kërkesat për qetësimin e situatës në veri.

BE-ja, e mbështetur edhe nga vendet e tjera perëndimore, ka tre kërkesa për Kosovën, të de-përshkallëzojë urgjentisht situatën në veri, të mbajë zgjedhje të reja dhe të rifillojë dialogun për normalizimin e marrëdhënieve.

Ambasada gjermane në Prishtinë theksoi në deklaratë se projektet e prekura aktualisht nga këto masa do të mund të rifillojnë pasi të merren “masat urgjente për deeskalim”.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.