Kreditimi në SHBA mbështet dollarin – Investitorët presin takimin e Bankës së Anglisë të enjten

Dollari u rrit të martën pasi një sondazh mbi huatë tregoi se kushtet e kredisë në SHBA ishin më pak të zymta se sa pritej, ndërsa paundi po flirton me nivelin më të lartë në një vit, për shkak të pritshmërive se Banka e Anglisë do të rrisë normat e interesit këtë javë. Në Azi, të dhënat e publikuara treguan se importet e Kinës ranë me 7.9% në prill, krahasuar me një vit më parë, ndërsa eksportet u rritën me një ritëm më të ngadaltë prej 8.5%, në të njëjtën periudhë, pas një rritje surprizë prej 14.8% në mars.

Forcimi i dollarit filloi që sesionin e kaluar, pasi anketa tremujore e Rezervës Federale tregoi se kushtet e kreditimit për biznesin dhe familjet amerikane vazhduan të shtrëngoheshin në fillim të vitit, por kjo u ndikua nga rritja agresive e normave të interesit nga rezerva Federale dhe jo nga sistemi bankar. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 101.5.

Ndërkohë, paundi britanik po qëndron në mbi 1.26 dollarë, shumë pranë nivelit më të lartë në 1 vit, ndërsa investitorët po presin takimin e Bankës së Anglisë të enjten. Analistët parashikojnë se Banka e Anglisë do ta rrisë normën bazë të interesit në 4.5%, pasi përpiqet të luftojë me inflacionin më të lartë, krahasuar me ekonomitë e zhvilluara. Në tregun e kriptomonedhave, bitcoin po tregtohet në rreth 27,500 dollarë, ndërsa ethereum po tregtohet në rreth 1840 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.